أيام تحنّ. . وشهور تغيب
آه..م النصيب..!
كنت انهزم جوّايا منّك..
واخاف عليك..
لا ف يوم تجيني..
تلاقي حد تاني .. حد غيرْ
ظلمك أوام خلاه أناني
ترجع تغير..!
واخاف م الغيرة لاحسن .. تكوي فيك
وانا اللي الغيرة تنهش فيّا لحمي..
وبرضه بخاف عليك..
وبالغالي اشتريك
من كُتر الأنين..دِبل الحنين
واكتم في شوقي ولهفتي ..
واصبر أنا..
طول السنين
واقول في يوم..يمكن يحسّ
يمكن يلين..
لو كنت أقدر..
كنت شلت حروف كلامك..
من سكوتي
كنت حبيت حد غيرك..
كنت قِدت شموع فراقك من زمان
كنت قلت بعلو صوتي:
مش بحبك..!
لو تغيب..انا مش هموت
حتى لو ضاقت حياتي
حتى لو زادت آهاتي
ولو هموم الكون مستنياني..
مش هخاف من بكرة تاني..!
ياما قلتلك: مليون بحبك..
من غير كلام
ياما عشت ليالي أبكي..
ياما كنت انوي الخصام
وأول اما اشوفك
أنسى أحزاني وملامي
أنسى عتابي ونار آلامي
وانسى الدموع
واعترف .. إني بحبك
ادّام عنيك
واوعدك .. من غير ما تطلب
إني ليك
وكل ده بلغة الدموع
وانوي الرجوع
وارجع..
ألاقي إنك بعيد
أقول: إيه الجديد؟
ماطول عمره بعيد
وانت يا قلبي اللي بتقرب وتبعد
أنت الحزين..انت الوحيد
وهو أقسى من الحديد
حبيبي .. أوعدك
مش هقول إني بحبك
مش هبكي من تاني عليك
مش هأسى ع العمر اللي راح..
من غير ما احس بقربي ليك
مش هنسى أيام الجراح..
أيام ما نسيتني عنيك
ومش هخاف..
مابقتش اخاف
ما بقتش اعمل حساب لجواب..
يمكن في يوم أقراه ف عنيك..!
أصلي حبيبي .. خلاص
ما بقتش انا بتاعة زمان
فاكر زمان؟!
ولا انت ليه..تفتكر؟
ما الدموع الباكية .. كانت من دموعي
والنيران كانت قايدة في ضلوعي
والحنان اللي راعيته من زمان
مكانش ليه ف قلبك مكان
ارضي غرورك..على حساب مشاعري
على حساب ضميرك
واي اللي يمنع..إني القي غيرك؟
واسمحلي اداوي جراحي منك
اسمحلي أنسى ف يوم هواك
وانسى العيون الكدّابين..
وكل أشواق السنين
وحلم عمري
نزيف مشاعري
والنحيب..
أما عن إحساسي من جوّه
فده مالكشي فيه نصيب
وسامحني .. يا أقسى حبيب
ليست هناك تعليقات:
إرسال تعليق