مـسـتـنـي مـيـن ؟!

عدّى النهار
وفضلت انا
واقف ما بين
جنة ونار
تايه في بير
مالهوش قرار

ييجي النهار
وراه نهار
واشوفه ليل
واقول يا ليل
بلاش مرار
كفاية حزن
كفاية همّ
وكفاية غربة
عن الديار

وانا كنت فاكر ان الغريب
هو البعيد عن الوطن
اتاري ممكن أكون في أهلي
ويبن حبايبي وماليش سكن
وبدون وطن!

ايه الوطن؟
انا نفسي اعرف

مين الغريب ؟

إيه السكن؟

ليه الوطن

مالهوش مكان؟

ولا ليه زمان؟

وبحس بيه

ولا انتهى الإحساس خلاص؟

ولو انتهى..فين الخَلاص؟

وبحنّ ليه

ولا الحنين تاه من سنين؟

وبقى البُكا..من غير دموع

زي الآهات..من غيرأنين

زي السفر..من غير رجوع

زي العنين..الكدابين

همه العيون..بقوا يكدبوا؟

لو البكا ممكن يكون من غير دموع

يبقى العيون..ممكن تخون

ممكن تموت..ممكن تجوع

للحظة دفا

أصل الوفا..

داق الأمرّين واكتفى

والغدر قاله بالشفا

بقى عملة نادرة..واختفى

عرفت ليه الليل بقى زي النهار؟

والطعم واحد..غصّة مليانة مرار؟

من غير تمن..

تاه الأمل..والحب والخير والدفا

فاكر زمان وايامه؟خلاص كله اتنفى

منفى القلوب يا صاحبي أفظع م الدمار

طول ما النجوم بتبان في عز النهار

يبقى الوفا .. أكيد اختفى

حتى السؤال .. بقى غير مباح

يبقى الجواب .. داق الخنوع

حتى الألم .. حتى الدموع

لا هتبكي..ولا هتقول:موجوع

اطفي الشموع

مستني مين؟

أصل السفر..

ملّ الرجوع

سبتمبر 2010