والـدي الـحـبـيـب

تعرف؟

يمكن أكون فرحان بلهفة قلبي ليك..

يمكن حزين..على عمري اللي راح

من غير ما احس انك معايا..

من غير ما تلمس قلبي بسمة حب صافية..

تغير مني عليك..!

كان نفسي احبك من زمان..

كان نفسي اتوه من الطريق..

ألاقي روحي بتندهك..

وانسى البشر كل البشر..واجري عليك

وابيع حزني وهمي..وحيرة قلبي فيك

واشتريك..

وأوهب عمري ليك..

وادوب في أحضان الحنان اللي ف عنيك

كان نفسي أفتح عيني ع الدنيا..

أشوفك..

أعرفك..

أقول إنك أبويا..قبل ما تنطق شفايفك..

قبل ما تقولي يا بنتي..

أفهمك..أستوعبك..

أعيش إحساس أبوة ياخدني من الوجود..

ويرجعني ليك

ياريتني ما كنت عشت ولا اتولدت..

ولا شوفت يوم دمعة ف عنيك

ولا إني اشوفك والزمن عامل عمايله فيك

كان نفسي أحبك من زمان..

كان نفسي أتعلم أقولك كلمة حلوة

تبلّ ريقك..

تداوي جرحك..

تمسح دموع غالية..تهوّن من عليك

حتى لو ما بتحبش تعبر عن عواطفك

كان لازم ارضى بالنصيب..

كان لازم أفضل شايفة فيك..والدي الحبيب

واقولك اللي مقدرتش تقوله..

وافكرك بوجودي جنبك..من بعيد أو من قريب

عشت الأبوة في خيالي..وأملي فيك كان عمّال يخيب

وقفت مكتوف الأيادي..وكنت فاكر إني راضي بالنصيب

كان لازم اعمل حاجة يمكن يدوب جليد القسوة من كتر اللهيب !

سامحني ماقدرتش أعبّر..

مقدرتش أفرح يوم ما ضمتني إليك

يمكن فرحت وخفت أبيّن..

أو خفت أصدق حلم افوق منّه لماضيك

لو كنت مش عارف تعبّر..عن حبك الهادي الحنون أنا راضية بيك

يمكن بحبك من زمان..لكن النهاردة قدرت اقولها بجد ليك

والدي الحبيب

نوفمبر 2009